Masharti ya Huduma
Kwa kutumia RAQIIMTECH Tools unakubali masharti haya.
1. Huduma hii ni nini
- RAQIIMTECH Tools inauza huduma za kidijitali kwa mafundi simu: kukodi tool kwa muda, credits za tool, na taarifa za simu kwa IMEI.
- Hatutengenezi simu kupitia tovuti hii. Unatumia huduma uliyonunua kwenye kompyuta au simu yako mwenyewe.
2. Simu halali tu
- Unaruhusiwa kutumia huduma hizi kwa simu unazozimiliki, au ulizopewa na mmiliki halali ili uzitengeneze.
- Simu za wizi au zilizopotea haziruhusiwi kabisa.
- Hatuuzi, na hatutauza: kubadilisha au kurekebisha IMEI, kuondoa simu kwenye blacklist, wala kuvuka kufuli za usalama (FRP, iCloud, MDM) bila uthibitisho wa umiliki. Kubadilisha IMEI ni kosa kisheria Tanzania (TCRA).
- Tukiona matumizi yanayokiuka masharti haya, tunaweza kufunga akaunti na kutoa taarifa kwa mamlaka husika.
3. Wallet na malipo
- Unaweka salio kwa mobile money (M-Pesa, Airtel Money, Mixx by Yas, HaloPesa). Salio linaonekana kwa TSh.
- Unapoweka oda, bei inashikiliwa kwenye wallet. Oda ikikamilika, kiasi hicho kinakatwa. Oda ikishindikana, kinarudi kwenye wallet yako chenyewe.
- Salio la wallet ni kwa ajili ya kununua huduma hapa. Si akaunti ya benki, na halilipi riba.
4. Kurudishiwa pesa
- Oda iliyoshindikana: pesa inarudi kwenye wallet papo hapo, bila kuomba.
- Oda iliyokamilika na majibu yakatolewa kwa usahihi hairudishiwi pesa, kwa sababu huduma ya kidijitali imeshatumika.
- Kama majibu si sahihi, au tool uliyokodi haikufanya kazi kwa kosa lisilo lako, tuandikie WhatsApp ndani ya saa 24 ukiwa na namba ya oda. Tukithibitisha, tunarudisha pesa kwenye wallet.
- Ukikosea IMEI, username au email uliyoandika, hatuwezi kurudisha pesa baada ya oda kukamilika. Hakiki kabla ya kuthibitisha.
- Salio ambalo halijatumika linaweza kurudishwa kwenye namba iliyolipia ukiomba, baada ya kutoa gharama za muamala.
5. Muda wa huduma
- Kila huduma inaonyesha muda wake wa kawaida wa kukamilika. Ni makadirio, si ahadi: baadhi ya huduma zinategemea wasambazaji wa nje.
- Kukodi tool: muda unaanza unapopewa taarifa za kuingia, na unaisha kwa wakati ulioonyeshwa. Baada ya hapo taarifa hazionyeshwi tena.
- Taarifa za kuingia ni zako peke yako. Usizishirikishe.
6. Kwa hatari yako mwenyewe
- Kuflashi na kazi nyingine za software zinaweza kuharibu simu au kufuta data. Unafanya kazi hizo kwa uamuzi na hatari yako mwenyewe.
- Hifadhi (backup) data ya mteja kabla ya kazi yoyote. RAQIIMTECH haiwajibiki kwa simu iliyoharibika au data iliyopotea.
- Majibu ya IMEI yanatoka kwa vyanzo vya nje. Tunajitahidi yawe sahihi, lakini hatuyadhamini kwa asilimia mia.
7. Akaunti na faragha
- Unaingia kwa akaunti ya Google. Tunahifadhi jina, email, namba ya simu uliyolipia, na historia ya oda zako ili kukuhudumia.
- Hatuuzi taarifa zako. Tunazitumia kukamilisha oda, kukutumia risiti na taarifa za oda, na kuzuia udanganyifu.
8. Mawasiliano
- Kwa swali au tatizo lolote, tuandikie kwa WhatsApp kupitia kitufe kilicho kwenye ukurasa wa oda au chini ya tovuti.